Joseph Kamaru – No Ithui twari Kuo
Ithuĩ no ithuĩ twarĩ kuo na no ithuĩ aya
Twehĩtĩirwo nĩ andũ othe nginya mburũ
Tũkĩohwo tũgĩthamio na no ithuĩ aya
Tuombanĩirwo nĩ andũ othe nginya ngati
Twatuĩtwo rũkũngũ nĩ nyakerũ Gĩkũyũ
Ngai akiuria mbura tũkĩhanda
Andũ aitũ mũtikorwo nĩ hinya
Kĩndũ kĩoma nĩ ũthingu wa mwĩrĩ
Na wendo wa Ngai ũrũme nyambo
Hinya witũ uumaga o kũrĩ Ngai
Arĩa atongoretie matingĩũra Gĩkũyũ
Nĩithuĩ twarĩ kuo na no ithuĩ aya
Kũrathimwo nĩ nyũmba ya Mũmbi
Hĩndĩ ĩrĩa twanyarirwo nĩ andũ a thĩ
Nĩguo Ngai atuongagĩrĩra mũno
Andũ aitũ ciana ici tũciarĩte
Tondũ ng’ombe na mbũri gũtitũire Gĩkũyũ
Mbeũ njĩthĩ monererio kwara
Indo iria nyingĩ ihũthagĩrwo Kenya
Ngwenda mũmenye nĩinyuĩ mwĩhokeirwo
Tĩĩri witũ mũtikarekererie
Nĩkwarĩ mũrĩmi na mũrĩi
Kiugo gĩa Gĩkũyũ nĩ mũgambo wa Ngai
Tahĩĩka wariganĩire iganjo
Mbaara ici mũroona ikĩrũo
Aingĩ matiarũire tũkĩrũa
Na angĩ matirĩ bata na tĩĩri
Gĩkũyũ mwĩmenyerere mangũ
Twaingatire nyakeerũ na rũrĩmĩ
Tũkiuga marothũrwo nĩ tĩĩri wa Kenya
Ngai witũ arĩ o Kirinyaga thũmbĩ
Nĩerire Gĩkũyũ na mũgambo
Kũrĩa guothe maitho maku marona
Nĩndakũhe hamwe na njiarwa ciaku
Ituamba noru na ngamba nooru Gĩkũyũ
Gũtirĩ mũndũ ũgakũruta kuo!
Nyũmba iitũ ndĩmũririkanie
Kĩrumi gĩa Kenyatta kĩrĩ guoya
Mũndũ ũrĩa ũkamunya itoka cia Kenya
Kana ecirie kwendia tĩĩri ũyũ mbeca
Agakahũka matũ na maniũrũ
Na Ngai nĩakamwĩkĩra ndaimono kĩongo
Anabii nĩ aingĩ Gĩkũyũ-inĩ
Marahorania ngoro cia mũingĩ
Mwacokania ndundu mwĩrane atĩa
Mũgũtwĩra atĩa tũtarĩ twerwo
Na Mũgo wa Kibirũ nĩakuire kĩhuki
Rekei tweterere itua rĩa Ngai
No comment