Andũ aitũ ngũrĩra wũũi na ndingĩona muoi
Ngageria kuuga mbu nyũmba ndirĩ mwĩtĩki
Ngahuha kĩhũni gũtirĩ ũrehũgũra
No gũthiĩ marathiĩ maitũ na nĩkwuoirire.

Andũ aitũ mwandiga wũũi o ngĩmwĩtaga
Na gũtirĩ mũndũ ũtarĩ ũtukũ wake
Waringa ngũyũ ũmũthĩ rũciũ menya nĩ ũngĩ
Wanduta rũboora nawe ngakũruta rũki.

Gĩkũyũ na Mũmbi ngwĩre tũkĩmathika
Matigire mauga nyũmba iitũ twendane, na
Wehaka thĩrĩga na niĩ ndĩhake mũhu
Gĩkũyũ athiĩ bata na niĩ ngũyage ngũcũ.

Mũgayũkano ũyũ ngũũria umĩte nakũ?
Na rũmena rũingĩ na ũiru wa ngoro
Na mboco yagwa thĩ nĩ twenyũranaga
Reke ya ira na iyo ĩrĩ kũriganĩra.

Ndĩramaka mũno ndoona mũhutatanĩire
Ũyũ arĩ na ngingo na ũrĩa ũngĩ ikengeto
Na ti kĩndũ kĩngĩ nĩ ũndũ wa ũiru wa mbeca
Ũgathikwo ũiniĩ ngwĩre ũtige ikĩrĩo.

Wendi wa Gĩkũyũ nyũmba nĩmwariganĩirwo
Mũgĩtua atĩ mbeca wũũi nĩcio ngai wanyu
Mwarega kũnjigua nyũmba mũcoke maganjo.
Mũgũkĩrĩana ngwĩre kinya ciana cianyu.

Gĩkũyũ ngũmwĩra mũigue kana mũikare
Tondũ ũiru wanyu nĩguo ũkũmũikia irima
Mathani ma Ngai ti ma gũthakĩrwo
Enda mũndũ ũrĩa ũngĩ o ta ũrĩa wĩendete.

Wanyonera Njambi maitũ Wanjirũ mũgeithie
Na ũmwĩre ndĩ o Kenya niĩ ngĩgariũra waya
Ciathegea mwaki nyambe huutatĩre riiko
Tondũ mũhĩa mbara nĩ ũrĩa ũrĩ mwĩhĩrĩto.