Joseph Kamaru – Certificate ya Maisha

Githĩ wanjĩraga tũthiĩ ũhiki inĩ ũkĩmenyaga
Atĩ nĩ ũgũcoka ũndige na ũthiĩ ũkamũgĩre
Muoka nake ũhiki inĩ wonanagia mũtirĩ nake
Na ndehũgũra na kũngĩ ũkamunĩra riitho

Ndathiĩ kahinda ngĩũka ndakorire agũĩkarĩĩre
Ngĩigua ta ndatemwo na rwenji ngĩrora na kũngĩ
Wendaga kũũraga ndutura igĩrĩ na ihiga rĩmwe
Ũriganĩirwo atĩ mũcemi akorire mũkungi

Githĩ ona rĩrĩa wanyinagia ndaaci kũu ũhiki inĩ
Nĩ fulani wanjoyagĩra nĩguo wone kamweke
Nĩwagĩthire nake wone kana kũrĩ ũndũ ingĩka
Tondũ nĩwarĩkĩtie kũmenya atĩ nĩngwendete

Ndagwethire kũu ũhiki inĩ kwerũ o kinya thegi
Andũ manyona maugage atĩ nĩkũrĩĩo ndĩĩtwo
Naniĩ ndameraga na ngoro kaba ndĩĩo nĩ wendo
Handũ ha kũũrĩo nĩ njohi ndagwa ngaaga muoi

Gũtirĩ ũndũ nĩwarĩmire kũngĩ na ũkĩhanda
Ũgĩtiga gwaku gũkĩũra mwendwa no ndũrĩ ũndũ
Ndagwetereire ũhiki inĩ kinya ngũkũ ikĩgamba
Ngĩheo lĩfuti ngĩinũka hana mũndũ mũkuĩre

Tondũ nĩwanduire turera ndũre ngumaga thutha
Nĩngũkũhe certificate waambe ũrĩange maisha
Ona kaba ũngĩathiĩte ũhiki inĩ tũtarĩ nawe
Handũ ha niĩ ũnjĩke matharau mbere ya andũ.

Ũthiĩ na angĩ kana wũikare mwendwa no ngwendete
Ona wanjĩĩra tũthii ũhiki rũciũ no tũgathiĩ
Nĩndakũhe certificate wĩke o ũrĩa ũngĩenda
Tondũ ona ingĩenda gũgũtiga mwendwa ndingĩhota

Ũthiĩ na angĩ kana wũikare mwendwa no ngwendete
Ona wanjĩĩra tũthii ũhiki rũciũ no tũgathiĩ
Nĩndakũhe certificate wĩke o ũrĩa ũngĩenda
Tondũ ona ingĩenda gũgũtiga mwendwa ndingĩhota