Iburahimu wa tene ithe wa wĩtĩkio,
Nĩerĩirwo nĩ Ngai kĩrathimo kĩa mwana,
Rĩrĩa Sarah aiguire ũhoro ũcio we agĩtheka,
Makĩrĩgĩrĩra na makĩĩhoka Ngai ũcio.

No ũrĩa matukũ magĩthiangire mũno,
Gweterera gwa Sarah gũgĩkĩnyiha mũno,
Akĩendia wĩtĩkio wake kũrĩ Haggai,
Na hau nĩho mwana Ishumaeli aciarĩirwo.

Ngũgweterera ngwĩrĩgĩrĩre na ngwĩhoke,
O wee ũtacenjagio nĩ imera o na kana iũndũ,
O wee ũcenjagĩria mũndũ rwĩmbo rwa mathĩna,
Agekora kanyumba kau ga kĩrathimo.

Kanyũmba kau ũkũigua gagĩtwo kĩrathimo,
Gatiragĩrĩrwo nĩ mĩthingi ĩno ĩtatũ,
Kwĩrĩgĩrĩra,gweterera ona kwĩhoka,
Nĩcio itugĩ iria ciambatagia kanyũmba kau.

Ĩndĩ mũthingi ũrĩa wĩtagwo gweterera,
Nĩguo wanaritũhĩra andũ aingĩ mũno,
Ngoro ya mũndũ ĩkarika kũũrwo nĩ hinya,
Akaya kũmatha irathimo na njĩra ĩngĩ.

Ngũgweterera ngwĩrĩgĩrĩre na ngwĩhoke,
O wee ũtacenjagio nĩ imera o na kana iũndũ,
O wee ũcenjagĩria mũndũ rwĩmbo rwa mathĩna,
Agekora kanyumba kau ga kĩrathimo.

Githĩ Esau ndendirie ũrigithathi wake,
Nĩ ng’aragu ya mũthenya ũmwe angĩakirĩrĩirie,
Ĩndĩ mũthingi wa gweterera ũkĩritũha,
Woiiyeiya akĩendia kĩrĩa kĩngĩamũgunire.

Ũguo noguo ona ũmũthĩ ũyũ andũ aingĩ mareka,
Ngoro ciao itirĩ mũthingi wa gweterera,
Mũndũ arenda tu o kwĩhoka na kwĩrĩgĩrĩra,
Nĩkĩo irathimo-inĩ Ishumaeli maroneka.

Ngũgweterera ngwĩrĩgĩrĩre na ngwĩhoke,
O wee ũtacenjagio nĩ imera o na kana iũndũ,
O wee ũcenjagĩria mũndũ rwĩmbo rwa mathĩna,
Agekora kanyumba kau ga kĩrathimo.

O wee Emanueli mũheani wa imera,
Ndũkanareke ngahanyũkia kĩmera gĩakwa ,
No nyende ngarĩkia ndĩ mũndũ mũkenu mũno,
Ngerirĩrio nginya nĩ arĩa mendaga kũndũkia.

Gũgweterera nĩũĩ ndanagweterera,
Ihingo na nja-inĩ ciaku nĩkuo ndethurĩire,
Reke ndanyihanyihĩrwo nĩ gũgweterera,
Ndũmagĩra roho waku agateithia ngoro ĩno.

Ngũgweterera ngwĩrĩgĩrĩre na ngwĩhoke,
O wee ũtacenjagio nĩ imera o na kana iũndũ,
O wee ũcenjagĩria mũndũ rwĩmbo rwa mathĩna,
Agekora kanyumba kau ga kĩrathimo.

Ngũgweterera ngwĩrĩgĩrĩre na ngwĩhoke,
O wee ũtacenjagio nĩ imera o na kana iũndũ,
O wee ũcenjagĩria mũndũ rwĩmbo rwa mathĩna,
Agekora kanyumba kau ga kĩrathimo.