Njaga ya mũkui ĩmenyagwo nĩ mũthambia
Nĩwe ũmenyaga karema gothe ke mwĩrĩ
Rĩrĩa Lazaro akuĩte Jesũ ũkĩmũriũkia
To gĩkeno kĩarĩ ho no harĩ ona thoni
Tondũ arĩa mamũthambĩtie makamũthika
Ona ariũka matũrire mamũthekaga
Nĩmonete njaga yake makamũmenya

Ugaga ndũhiũhaga na ndũceragĩrwo
Ndigũkũruta mahĩtia nĩ gũgũthaitha
Korwo nĩwakinyĩte Lazaro atakuĩte
Ndangĩonetwo njaga ndangĩanungĩrĩre andũ
Ndahoya maisha-inĩ makwa ũkinyage mbere
Aya manjũĩ matanakĩnyona njaga

Kinyaga mbere Mwathani ĩ kĩnyaga mbere
Ndahoya maisha-inĩ makwa ũkinyage mbere
Itanakua na nunge andũ mamenye mũno
Itanakomba komba na itanararĩra
Kinyaga mbere Mwathani ĩ kĩnyaga mbere

He ngũrani ya gũcererwo na gũtĩĩra
Nĩ harĩ gũkinya mbere na kũiga ithaa
Jesũ no werĩtwo Lazaro nĩ mũrwaru
No ndwathiire kũmũhonia ũgĩcerithĩria
Warekire mũrataguo akue na athikwo
Ũgĩgĩtũma andũ mamenye ũrĩa anungaga
Niĩ ndikwenda andũ mamenye ũrĩa nungaga

No nĩnjũĩ atĩ ona waikara no ũrĩũka
No waikara ũgũma njagĩrwo mwĩhoko
Kwa Lazaro wathiire thutha wa thikũ inya
Mwarĩ wa nyina akwĩrage ona nĩaranunga
Ũngĩikara ũtanjenjeirie mũtũrĩre ũyũ
Ona arĩa marĩ aitũ no manjirĩre ngoro

Kinyaga mbere Mwathani ĩ kĩnyaga mbere
Ndahoya maisha-inĩ makwa ũkinyage mbere
Itanakua na nunge andũ mamenye mũno
Itanakomba komba na itanararĩra
Kinyaga mbere Mwathani ĩ kĩnyaga mbere

Rĩrĩa mũndũ egũkomba nĩerutaga nguo
Itanakomba komba wee kinyaga mbere
Itananjia gũtarĩria mathĩna makwa
Mũndũ akanjũria urakomba ũkarĩha na kĩ?
Ona angĩhutio angombere no arĩnjambia
Augage ona kĩna kĩu enakĩo nĩ gĩakwa
Mwathi itanakinya hau kinyaga mbere

Gũtirĩ thoni ta mũndũ akĩhoya nguo
Itanakinya kũhoya kinyaga mbere
Itanera mũndũ he ĩno thiĩ handũ nayo
Ndĩmũhingũrĩre ngoro amenye ndirĩ
Ona no anjonorithie ndĩ mbere ya andũ
Akiuga ũrĩa thakarĩirwo nĩ nguo yake
Mwathi itanakinya hau ĩ kinyaga mbere

Kinyaga mbere Mwathani ĩ kĩnyaga mbere
Ndahoya maisha-inĩ makwa ũkinyage mbere
Itanakua na nunge andũ mamenye mũno
Itanakomba komba na itanararĩra
Kinyaga mbere Mwathani ĩ kĩnyaga mbere

Gũtirĩ ũndũ mũũru ta kũrarĩria ciana
Citanararĩra Ngai ĩ kinyaga mbere
Itanatonya kwa mũndũ kũhoya mũtu
Anjũrie kaĩ ndaciaraga anderagĩre
Baba ciana ciakwa itanaingatwo cukuru
Itũũra igima rĩmenye ciana irĩ mũciĩ
Woii ingĩnunga o ta ũrĩa Lazaro anungire

Baba maitho ma andũ no maranjũthĩrĩria
Matanakinya kũnyona kinyaga mbere
Ingĩona thĩna mauge nĩwanyanũkũra
Ndacooka thĩ moige nĩwe wandiganĩria
Monie kwĩ mĩaka ya bũthi na ya ng’aragu
Na ng’aragu yathira ngũrĩa na ndĩhake
Ndũkareke makue matonete ũrĩa ũngĩĩka

Kinyaga mbere Mwathani ĩ kĩnyaga mbere
Ndahoya maisha-inĩ makwa ũkinyage mbere
Itanakua na nunge andũ mamenye mũno
Itanakomba komba na itanararĩra
Kinyaga mbere Mwathani ĩ kĩnyaga mbere

Mũciari akuithagia mwana nĩũndũ wa thĩna
Ngai itanakinya hau ĩ kinyaga mbere
Agĩte mbeca cia kũrĩha prĩvate
Mwana agakuĩra raini-inĩ amũcũthĩrĩirie
Agathekererwo itũũra-inĩ nĩeremirwo
Aciara mwana ũngĩ akoona onake tegũkua
Mũciĩ wa mũciari ta ũcio kinyaga mbere

Nĩkũrĩ ciana itũũraga ihana ta ng’ombo
Ciakwa itanakinya hau ĩ kinyaga mbere
Iria itũũraga itũmanagĩrwo itũũra-inĩ
Gĩĩra ciana cia ng’ania ithimĩrwo mabuti
Na mũcaara nĩ irebe rĩa waru irio cia nda
Na ciugo cia kĩnyũrũri ĩ cia kũmahũthia
Ciakwa itanakinya hau ĩ kinyaga mbere

Kinyaga mbere Mwathani ĩ kĩnyaga mbere
Ndahoya maisha-inĩ makwa ũkinyage mbere
Itanakua na nunge andũ mamenye mũno
Itanakomba komba na itanararĩra
Kinyaga mbere Mwathani ĩ kĩnyaga mbere