Muigai wa Njoroge – Ungiuga ni Uguthii Lyrics

Torĩa thĩ nyũmũ ĩriragĩria maaĩ
Mweri wa mũgaa mũthanga ũkĩhenahenia ũgũo nĩ riũa
Noguo ngoro yakwa ĩnyotagĩra wendo waaku
Noguo mwĩrĩ wakwa ũmisaga kũhĩmbĩria mwĩrĩ waku

O ta mũthigari arĩ training agĩthomithio atuĩke njamba
Noguo ngwĩrutĩra ndũũre ngitagĩra ngoro ĩĩnoo
Nĩtondũ he ciugo itangĩenda ikoima kanua gaaaku

Ũngiuga nĩ ũgũthiĩ ingĩgũkinyĩra tu ũtanathiĩ
Ũngiuga ndũkũnyenda ingĩgũthaitha ngũturĩirie ndu
Tondũ ũngiumagara ũgũe moko-inĩ ma mũndũ ũngĩ
Gũgũcaria na gũgũcokia nĩ karũgano kangĩraiha

Wokire kũrĩ niĩ ũhana njata matuinĩ mairũũ
Ũrĩa imetametaga igatũma nduma ĩthakare na ikagucĩrĩria
Ũgĩũka ta rũgiri ũkĩirigĩra wĩthĩ wakwa
Ũgĩtuma maisha makwa magĩe mũcamo,mũcamo wĩ camaa

Woire ruo rwakwa ruothe o ta rwarĩ rwaku mũnyendi
Ũkĩnjigĩrĩra gĩthiirĩ kĩa wendo ngũtũũra ndĩhaaaga
Ĩ Ngai aroteithia tũbuthia twa wendo tũikare haraya

Ũngiuga nĩ ũgũthiĩ ingĩgũkinyĩra tu ũtanathiĩ
Ũngiuga ndũkũnyenda ingĩgũthaitha ngũturĩirie ndu
Tondũ ũngiumagara ũgũe moko-inĩ ma mũndũ ũngĩ
Gũgũcaria na gũgũcokia nĩ karũgano kangĩraiha

Mũndũ nĩ agũragwo na mbũũri na ng’ooombe
Ĩ ngoima igathĩnjwo mũhĩrĩga na andũ magakenanĩra
Nake kagũrani akainũkia mũhiki agakenee
Ĩ cienyũ cia mwĩrĩ rĩrĩa ciahutania gwa kagũrani no gĩkenoo

Ndikũigua ngĩenda ũndũ ũngĩ tiga o gũikara tũkuhanĩriirie
Wanjigĩrĩra guoko kĩeha gĩakwa kĩhũaga ta maaĩ
Hĩndĩ ĩrĩa wanyenda ĩ noguo hotaga kwĩyenda

Ũngiuga nĩ ũgũthiĩ ingĩgũkinyĩra tu ũtanathiĩ
Ũngiuga ndũkũnyenda ingĩgũthaitha ngũturĩirie ndu
Tondũ ũngiumagara ũgũe moko-inĩ ma mũndũ ũngĩ
Gũgũcaria na gũgũcokia nĩ karũgano kangĩraiha

Ngenaga rĩrĩa tũmĩromo twaku twĩ tũtuunee
Gũtunĩha wega ta tũtoboketio ndibei-inĩ ya mũthabibũ
Rĩrĩa maitho maku maracũngĩrĩra ĩ na ti toro ũkũnyitĩĩte
Nĩ ngoro ĩrahũũra ĩkĩnyotera yakwa tũceracerange riera-inĩ

Korwo no hote gũtarĩrĩa mũnyendi ngwendete nginya ha
Korwo ndahingũka ta ibuku ũthome ũmenyeee
Ũngĩrũgarũga ta kaana nĩ kũigua ũkenete ee

Ũngiuga nĩ ũgũthiĩ ingĩgũkinyĩra tu ũtanathiĩ
Ũngiuga ndũkũnyenda ingĩgũthaitha ngũturĩirie ndu
Tondũ ũngiumagara ũgũe moko-inĩ ma mũndũ ũngĩ
Gũgũcaria na gũgũcokia nĩ karũgano kangĩraiha

Ta mũtĩ wa icungwa ũrĩ gatagatĩ ka mĩigua
Noguo maitho makwa magũkũranaga wĩ gatagatĩ ga kĩrĩndĩ
O mũkũnga mbura na marangĩ maguo ũngĩigwo mbere yakwa
Ũthaka ũcio waguo ndũngĩtũma njeherie maitho makwa ĩĩ harĩ wee

Ndirĩ ũndũ ndigĩtie niĩ nĩnjiganĩire mũbango inĩ waku uu
Bata nĩ ũkĩbanga ũbangĩre wega mũnyendii
Ndirĩ ũndũ ũngĩ ngwenda tiga ndũũre nguonaga gwakwaaa

Ũngiuga nĩ ũgũthiĩ ingĩgũkinyĩra tu ũtanathiĩ
Ũngiuga ndũkũnyenda ingĩgũthaitha ngũturĩirie ndu
Tondũ ũngiumagara ũgũe moko-inĩ ma mũndũ ũngĩ
Gũgũcaria na gũgũcokia nĩ karũgano kangĩraiha